Stjórnskipan

Endurskoðun stjórnarskrárinnar

Stjórnarskráin er samfélagssáttmáli þeirra sem byggja Ísland og því þarf ferlið við endurskoðun hennar að byggja á gagnsæi og skýru lýðræðislegu umboði. Afstaða Framsóknar til breytinga á stjórnarskrá miðast við gildi og grundvallarstefnu flokksins og þá efnahagslegu sýn að manngildið sé fremra auðgildinu. Slík endurskoðun þarf að byggja á trúverðugu ferli sem endurspeglar eðli verkefnisins og að tryggt verði að ákvæði hennar endurspegli sem best sameiginleg grunngildi þjóðarinnar.

Framsókn leggur til að skoðað verði að festa ítarlegri ákvæði um dómsvaldið í stjórnarskrá sem tryggja betur sjálfstæði dómsvalda.

Forseti Íslands

Forseti gegnir mikilvægu hlutverki í stjórnskipan Íslands. Hann hefur vel skilgreind og virk úrræði til að þjóna sem öryggisventill í þágu almennings, til dæmis með því að skjóta umdeildum málum í atkvæði þjóðarinnar.

Forseti þarf að hafa skýrt umboð meirihluta þjóðarinnar sem meðal annars væri hægt að ná fram með tveimur umferðum kosninga eða varaatkvæðiskerfi (e. Alternative vote).

Endurmeta ætti ákvæði um lágmarksaldur forseta.

Framsókn vill að meðmælafjöldi vegna forsetaframboðs verði endurskoðaður.

Kosningaréttur

Framsókn leggur til að kosningaréttur miðist við byrjun þess árs sem einstaklingur nær kosningaaldri en ekki fæðingardag. Ekki er ástæða til að neita þeim sem eiga fæðingardag eftir kjördag um þátttöku í kosningum. Umrædd breyting gæti haft í för með sér jákvæð áhrif á kosningaþátttöku ungmenna, sem ganga þá saman sem árgangur til kosninga.

Trú- og lífsskoðunarfélög áfram studd

Framsókn styður trú- og lífsskoðunarfrelsi. Framsókn vill að sóknargjöld renni óskert til allra trú– og lífsskoðunarfélaga fyrir þá sem kjósa að skrá sig í þau.

Framsókn vill að áfram verði stutt við öflugt starf Þjóðkirkjunnar um land allt enda hefur hún skyldur við alla landsmenn.